skip to Main Content
सम्पर्क: +977-23-563188 / 562847 (प्रधान कार्यालय) Check Mail Career Reports Download Contact us

‘सहकारी अभियानको ऐक्यवद्धता भएमा स्थानीय सरकारमा पठाउने ब्यक्ति निर्धारण गर्न सकिन्छ’ ः अध्यक्ष कडेल

मेचीनगर । सहकारीमा बसेर राजनीति गर्नुहुँदैन र सहकारीभित्र राजनीति भित्राउनु पनि हुँदैन । अहिलेसम्मको विश्व मान्यता यही हो । तर सहकारी अभियानलाई राजनीतिक दृष्टिकोणबाट कमजोर नठान्न राष्ट्रिय सहकारी महासंघका अध्यक्ष मिनराज कडेलले राजनीतिकर्मीलाई सुझाएका छन् । उनका अनुसार सहकारी अभियानको ऐक्यवद्धता भएमा हरेक स्थानीय सरकारमा कसलाई पठाउने भन्ने निर्धारण गर्न नेपालका सहकारी सक्षम छन् ।
नेपाल बहुउद्देश्यीय सहकारी संस्था (एनएमसी)को २९औं वार्षिक साधारणसभा अन्तर्गत सम्पन्न माइन्युट प्रमाणित साधारणसभामा प्रमुख अतिथिको मन्तब्य राख्दै महासंघका अध्यक्ष कडेलले यस्तो धारणा राख्नुभएको हो । एनएमसीका संस्थापक सदस्य मीना पोखरेल उप्रेती र पूर्व सञ्चालक श्रीप्रसाद मैनालीलाई मतदान गरी राजनीतिक जिम्मेवारीमा पु¥याउन एनएमसीका ज्ञात अज्ञात सदस्यहरुको योगदान रहेको उहाँहरुको मन्तब्य सुनेपछि महासंघका अध्यक्ष कडेलले सहकारी अभियान अब बलियो बन्दै गएको बताउनु भएको हो ।
सहकारी अभियान अन्तर्गत आफू सहभागी सबै फोरममा एनएमसीका प्रगतिका अनेकन आयामका बारेमा कुरा उठाउने गरेको सुनाउँदै उनले बहुउद्देश्यीय प्रकृतिको कारोबार गरे पनि संस्थाले पल्सको सूचांक नजिक रहेकोमा खुशी ब्यक्त गर्नुभयो । केही सहकारीले गरेको बदमासीको कारण सहकारी क्षेत्रको काम कारबाहीमा प्रश्न तेर्सिने गरेको बताउँदै उहाँले अध्यक्ष कडेलले भने, ‘सयौंमध्ये एकाध संस्थाले गरेका कमी कमजोरीकै आधारमा समग्र सहकारीमाथि प्रश्न उठाउनु जायज हुँदैन ।’


संस्थाका अध्यक्ष रामचन्द्र उप्रेतीको अध्यक्षतामा आयोजित माइन्युट प्रमाणित साधारणसभामा ४३ वटा एकाइ साधारणसभाबाट प्राप्त करिब २०० सुझाव, टिप्पणी एवम् मागलाई एकीकृत साधारणसभामा सुनवाई गरिँदै माइन्युट प्रमाणित गरिएको हो ।
कार्यक्रमका विशेष अतिथि प्रदेश १ का सहकारी रजिष्ट्रार बलराम निरौलाले सहकारीले व्यवसायिकता र सेयर सदस्यको पेशालाई प्रवर्धन गर्न विशेष ध्यान दिनुपर्ने बताउनुभयो । उहाँले सहकारीहरुले बहुप्रकृतिको अनुकरणीय संस्थाको रुपमा विकास गर्न आवश्यक देखिएको बताउनुभयो । रजिष्ट्रार निरौलाले एनएमसीले सामाजिक छवि बढाउन थप केही रचनात्मक कार्यहरु गर्नु आवश्यक रहेको सुझाव पनि दिनुभयो ।
बहुव्यवसाय सञ्चालन गरे पनि अझै ९६ प्रतिशत कारोबार वित्तीय क्षेत्रकै रहेको प्रष्ट्याउँदै रजिष्ट्रार निरौलाले व्यवसाय विविधिकरण गर्न र नमूना सहकारी संस्था बनाउन सुझाव दिनुभयो । एनएमसीका काम हेरेर अरु सहकारीले सिक्ने हुन् भन्दै उहाँले प्रत्येक सदस्यको भावनाको प्रतिनिधित्व हुनेगरी काम गर्नुपर्ने बताउनुभयो । देशका ३० हजार सहकारीमध्ये ८० प्रतिशत स्थानीय सरकारले, १८ प्रतिशत प्रदेश सरकारले र बाँकी २ प्रतिशत संघीय सरकारले नियमन गरिरहेको निरौलाको भनाई छ ।


सो कार्यक्रममा प्रदेशसभाका सदस्य श्रीप्रसाद मैनालीले दुई लाख ५३ हजार सेयर पँुजीबाट सुरु गरेको एनएमसीमा आज एक अर्बभन्दा माथि पुगेकोमा खुशी व्यक्त गर्नुभएको थियो । उहाँले एनएमसीले नमूना एकीकृत कृषि फार्मजस्तै एनएमसीले नमूना सहकारी अस्पताल र विद्यालय सञ्चालनको अवधारणा ल्याउनु पर्ने सुझाव दिनुभयो । संस्थाकै विपन्न सदस्यका सन्तान पढाउन एक नगर, एक नमूना विद्यालय बनाउन अग्रसरता लिन सांसद मैनालीको सुझाव थियो ।
मेचीनगर नगरपालिकाका उपप्रमुख मिना पोखरेल उप्रेतीले एनएमसीले आर्थिक र सामाजिक रुपान्तरणसँगै धेरै नेतृत्व जन्माएको बताउनुभयो । एनएमसीमा रहेर विभिन्न जिम्मेवारीमा काम गरेकै कारण धेरैजनासँग चिनजान भएको र आज नगरपालिकाको उपप्रमुख बन्न उहाँहरुको साथ पाएको उपप्रमुख उप्रेतीले स्मरण गर्नुभयो ।
उहाँले एनएमसीको औद्योगिक ग्रामको अवधारणालाई स्थानीय सरकार सहकार्य गर्न तयार रहेको र प्रदेश सरकारले समेत उत्सुकता देखाएको बताउनुभयो । सहकारी र स्थानीय सरकारका कामहरु मिल्दाजुल्दा छन्, यसमा एकाकार हुन सकियो भने आयआर्जन बढाउन, किसानका उत्पादनलाई बजारीकरण गर्न तथा गरिबी न्यूनीकरण गर्न मद्दत पुग्ने उहाँको विश्वास छ ।
साधारणसभाका अर्का वक्ता झापा जिल्ला सहकारी संघका अध्यक्ष तथा राष्ट्रिय सहकारी महासंघका सञ्चालक गणेश ढकालले एनएमसी देशभरका सहकारीमध्ये आदर्श र असल अभ्यास गरिरहेको संस्था भएको बताउनुभयो । एनएमसीसहित सबै सहकारीले अब लघु उद्यमशीलताको अभ्यास गर्न आवश्यक भइसकेको जनाउँदै ढकालले ऐनअनुसार ३ वर्षमा व्यवसाय विविधकरणमा खर्च गरेको भए संस्था आजको अवस्थामा रहने थिएन भनी उक्त प्रावधान सच्याउनु पर्ने आवश्यकता औंल्याए ।


उनले एनएमसीले जस्तै अन्य सहकारीले पनि सेयर सदस्यले उत्पादन गरेका सामग्रीको बजारीकरणमा ध्यान दिनुपर्ने सुनाउनुभयो ।
वडा नम्बर १४ का वडाध्यक्ष शंकर पोखरेलले एनएमसीको एकीकृत कृषि नमूना फार्मले दुहागढीलाई देशभर चिनाएको बताउनुभयो । उहाँले भन्नुभयो, एनएमसीले दुहागढीको पहिचान बनायो, हामी गौरव गर्छौं । यो संस्थाबाट सरकार सञ्चालन गर्ने असल संस्कार राज्यले पनि सिक्नुपर्छ ।
संस्थाका उपाध्यक्ष भगवती घिमिरे मैनालीले स्वागत गर्नुभएको कार्यक्रमको सञ्चालन संस्थाका प्रमुख कार्यकारी अधिकृत लक्ष्मीप्रसाद उप्रेतीले गर्नुभएको थियो । कार्यक्रममा वार्षिक प्रतिवेदन अध्यक्ष रामचन्द्र उप्रेतीले र आर्थिक प्रतिवेदन लेखा सुपरीवेक्षण समितिका संयोजक विष्णु गौतमले प्रस्तुत गर्नुभएको थियो

This Post Has 0 Comments

Leave a Reply

Back To Top